Լրահոս

Ադրբեջանին, փաստորեն, մինչ օրս հաջողվել է իր քմահաճություններն անցկացնել ՀԱՊԿ-ում

 

bordyuja

Դեկտեմբերի 29-ին Տավուշի մարզի Չինարի գյուղի մոտակայքում տեղի ունեցած դիվերսիոն հարձակումից հետո, երբ հայկական կողմը 3 զոհ ունեցավ` ՀԱՊԿ գլխավոր քարտուղար Նիկոլայ Բորդյուժան այն որակեց սադրիչ, սակայն այդպես էլ չհստակեցնելով, թե ով է սադրանքի հեղինակը: Սակայն նա օգտագործեց` Լեռնային Ղարաբաղի Հանրապետություն եզրույթը, որը պաշտոնական Երևանին շատ էր ուրախացրել: ՀՀԿ խոսնակ, ԱԺ փոխնախագահ Էդուարդ Շարմազանովը նշեց, թե Բորդյուժան` «ոչ թե վրիպել է, այլ կոնկրետ ազդակ է ուղարկել Ադրբեջանին»:
Հիշեցնենք, որ ՀԱՊԿ-ի պաշտոնական կայքէջում Նիկոլայ Բորդյուժան մասնավորապես ասել էր. «ՀԱՊԿ անդամ պետության տարածքում տեղի ունեցած այդ գործողությունները գնահատում ենք սադրիչ, հատկապես այս տարվա ապրիլին Լեռնային Ղարաբաղի Հանրապետությունում ծանր սպառազինության և զրահատեխնիկայի կիրառմամբ տեղի ունեցած բավական լուրջ միջադեպի ֆոնին: Թվում էր, թե երկու կողմերի, ինչպես նաև մի շարք պետությունների ղեկավարների գործադրած ջանքերի շնորհիվ, ղարաբաղյան հակամարտության կարգավորման գործընթացը վերջապես կակտիվանա: Սակայն, վերջին շրջանում կրակի դադարեցման պայմանավորվածության պարբերական խախտումների մասին տարածաշրջանից ստացվող տեղեկությունները, ինչպես նաև զինծառայողների մահվանը հանգեցրած՝ դեկտեմբերի 29-ի հերթական միջադեպը լուրջ մտահոգություն են առաջացնում»:
ՀՀԿ-ն դրական էր գնահատում Բորդյուժայի հայտարարությունը՝ ընդգծելով, որ առաջին անգամ հասցեական քննադատություն է հնչել․«Եթե նախկինում թե՛ ՀԱՊԿ-ը, թե՛ համանախագահ երկրները, թե՛ միջազգային հանրությունը ղարաբաղյան կարգավորման մասին խոսելիս, ղարաբաղյան կողմի մասին խոսելիս նշում էին Լեռնային Ղարաբաղ եզրույթը, ապա հիմա հենց ՀԱՊԿ-ի պաշտոնական կայքում կարող ենք ռուսերենով կարդալ՝ Լեռնային Ղարաբաղի Հանրապետություն: Ես չեմ կարծում, որ սա վրիպում է, ես կարծում եմ, որ սա հստակ ազդակ է, և առաջին անգամ ՀԱՊԿ-ի նման կառույցը, խոսելով Լեռնային Ղարաբաղի մասին, օգտագործում է ԼՂՀ եզրույթը: Եվ սա խիստ ազդակ է՝ ուղղված Ադրբեջանին: Ես կարծում եմ, որ այս մեկնաբանությունը պետք է օրինակ ծառայի մյուս միջազգային կառույցների համար»:
Պաշտոնական Բաքուն ևս արձագանքեց Բորդյուժայի հայտարարությանը: Ադրբեջանի ԱԳՆ-ը հայտարարություն տարածեց հայ-ադրբեջանական սահմանին գրանցված միջադեպի վերաբերյալ ՀԱՊԿ գլխավոր քարտուղար Նիկոլայ Բորդյուժայի տված գնահատականի վերաբերյալ։ Ադրբեջանի ԱԳՆ-ը Բորդյուժայի մեկնաբանությունը որակել է որպես «սուբյեկտիվ» և «անընդունելի»՝ կապված նրա հետ, որ դրանում օգտագործվել է ԼՂՀ հապավումը. «Դա հակասում է կազմակերպության մասնակից երկրների պաշտոնական դիրքորոշմանն ու բանակցային գործընթացի էությանը, որն անցկացվում է ԵԱՀԿ Մինսկի խմբի համանախագահների միջնորդությամբ։ ՀԱՊԿ-ի ղեկավարը որևէ հայտարարություն անելուց կամ մեկնաբանություն տալուց առաջ պետք է լավ գնահատեր ու վերլուծեր իրավիճակը»։
Մինչ պաշտոնական Երևանում տոնում էր հաղթանակը` Բորդյուժայի հայտարարությունը արժանի հակահարված որակելով` ՀԱՊԿ-ի գլխավոր քարտուղարի պարտականությունները փոխանցվեցին Վալերի Սեմերիկովին: ՀԱՊԿ գլխավոր քարտուղար Նիկոլայ Բորդյուժայի պարտականությունները հունվարի 1-ից փոխանցվել են նրա տեղակալ Վալերի Սեմերիկովին։
Ինչպես հաղորդում է կազմակերպության պաշտոնական կայքը, որոշումը կայացվել է ՀԱՊԿ խորհրդի՝ դեռևս 2015-ի դեկտեմբերի 21-ի որոշման հիման վրա, որով Նիկոլայ Բորդյուժայի պարտականությունները երկարաձգել էին ևս մեկ տարով՝ մինչև 2017-ի հունվարի 1-ը։ Թե որքան ժամանակ ՀԱՊԿ գլխավոր քարտուղարի պարտականությունները կկատարի Վալերի Սեմերիկովը, կառույցի պաշտոնական էջը չի հաղորդում։
ՀԱՊԿ գլխավոր քարտուղարի պաշտոնը դեռ 2015-ին ռոտացիոն կարգով պետք է փոխանցվեր Հայաստանի ներկայացուցչին, սակայն որոշում էր կայացվել հարցը մեկ տարով հետաձգել: Անցած հոկտեմբերին ՀԱՊԿ երևանյան գագաթնաժողովում հայտարարվեց, որ գլխավոր քարտուղարի նշանակման հարցը կլուծվի հաջորդ՝ սանկտպետերբուրգյան գագաթնաժողովին: Այստեղ էլ, սակայն, հարցը չքննարկվեց: Իսկ վերջերս Նիկոլայ Բորդյուժան լրագրողներին ասել էր, որ ռազմաքաղաքական դաշինքի գլխավոր քարտուղարի փոփոխության հարցը կդիտարկվի գալիք ապրիլին կայանալիք գագաթնաժողովին։
Բորդյուժայի պարտականությունների փոխանցումը նրա տեղակալին, իհարկե, «ներքին ընթացակարգ է»: Ինչո՞ւ է Հայաստանի ներկայացուցչի նշանակումը ռազմաքաղաքական դաշինքի գլխավոր քարտուղարի պաշտոնում շարունակում մնալ չլուծված։ Շատերի կարծիքով ՀԱՊԿ-ին չանդամակցող Ադրբեջանն է պատճառը, որը խոչընդոտում է Հայաստանի ներկայացուցչի նշանակմանը՝ ազդելով ՀԱՊԿ անդամ իր գործընկերների վրա:
Լինենք անկեղծ, Ադրբեջանին, փաստորեն, մինչ օրս հաջողվել է իր քմահաճություններն անցկացնել ՀԱՊԿ-ում։ Իհարկե, Բորդյուժայի պաշտոնավարման ժամկետը սպառվում էր դեկտեմբերի 31-ին: Բայց այս դեպքում պետք է արձանագրենք, որ պաշտոնական Երևանի համար այդքան դուրեկան եզրույթը` Լեռնային Ղարաբաղի Հանրապետությունը, ընդամենն օգտագործել էր պաշտոնից հեռացող Բորդյուժան:

Մետաքսյա Շալունց

Մանրամասն սկզբնաղբյուրում՝

hayeli.am

Միացեք մեր ֆեյսբուքյան էջին և հետևեք ամենաուշագրավ նյութերին


Կիսվիր ընկերներիդ հետ

Կայքում տեղ գտած մտքերն ու տեսակետները հեղինակի սեփականությունն են և ոչ միշտ են համընկնում ՀԻՆԳ.am-ի խմբագրության տեսակետների հետ:
loading...