Լրահոս

Անցումային իրավիճակ է, ռազբորկաների շրջան՝ զենքի գործադրմամբ

 

Մեր զրուցակիցն է ԱԺ ՀՀԿ խմբակցության պատգամավոր, նախկին ոստիկանապետ Ալիկ Սարգսյանը

Պարոն Սարգսյան, վերջին օրերին ՀՀԿ-ում քննարկումներ են «Ընտանեկան բռնության կանխարգելման մասին» օրենքի նախագծի նախնական տարբերակի վերաբերյալ։ ՀՀԿ-ականները նշում են, որ խնդրահարույց նախագիծ է։ Ի՞նչն է մտահոգում։ Ի վերջո, սա ՀՀԿ-ական կառավարության նախագիծն է, չէ՞։

Այնուամենայնիվ, կարծում եմ՝ մեր ժողովրդի համար այդ օրենքի ընդունումը որոշակի նշանակություն ունի, զուտ հոգեբանական, բարոյական և այլ առումներով։ Ընտանիքի մասին մեր պատկերացումները բոլորին հայտնի են, ես էլ եմ այդ կարծիքին, որ մեր հայկական ընտանիքը կարծես թե այդպիսի ուշադրության արժանանալու հատուկ կարիք չուներ։ Բայց քանի որ թվական տվյալներ կան, վիճակագրություն կա, որ նման տվյալներ ամեն տարի գրանցվում են, և դա դիտարկվում է որպես ընտանեկան բռնություն, հետևաբար քննարկման ենթակա հարց է, մենք էլ քննարկում ենք։ Ինչևէ, այս օրենքը ենթադրում է լուրջ ֆինանսական ներդրումներ։

Ապաստարանների կառուցումը նկատի ունե՞ք։

Ապաստարանները, հոգեբանական, առողջապահական տարբեր տեսակի աջակցություն։ Այսպես թե այնպես, այդ աջակցությունը տրամադրվում է, բայց ուզում են օրենքով կանոնակարգել։ Ճիշտն ասած, իմանալով, թե որ երկրներում է դա ընդունված, առայժմ պատկերացում և համապատասխան տեղեկատվություն չունեմ, թե այդ երկրներում դա ինչպես է կիրառվում, թե՞ պարզապես թղթի վրա գրված է ու վերջ։ Եթե ուղղակի պետք է թղթի վրա մնա՝ ցույց տալու Եվրոպային, որ մենք ընդունել ենք այս օրենքը և ոչինչ չպետք է կիրառվի իրականում, դրա իմաստը ո՞րն է։ Եթե կյանքի չի կոչվելու, պարզապես ընդունելու խնդիր է, հարկավոր է դրան մի քիչ այլ կերպ վերաբերվել։ Ես կարծում եմ՝ կքննարկվեն այն միջոցառումները, որոնք մեր պետությունը պատրաստ է իրականացնել ընտանեկան բռնությունների դեմ պայքարի գործում։ Այլապես օրենսդրական խստություններ, պատժիչ գործողություններ օրենքի հետ կապված, կարծես թե օրենքում չի նախատեսվում։

Վերջերս Սերժ Սարգսյանը ոստիկանությանը հրահանգեց զինաթափման գործընթաց սկսել։ Ինչո՞վ է պայմանավորված նման հայտարարությունը, Ձեր՝ ոստիկանապետ եղած ժամանակ նման հրահանգ  եղե՞լ է։

Բնականաբար, այս 20 տարիների ընթացքում, անկախություն, Արցախյան պատերազմ, կասկածից դուրս է, որ ժողովրդի ձեռքին որոշակի զինամթերք, զենքի տարբեր տեսակներ դեռ պահպանվում են։ Այս հրահանգը նախագահի կողմից մշտապես եղել է, իմ ժամանակ էլ, ինձնից առաջ էլ, որ հարկավոր է զինաթափել, մարդկանցից զենքը վերցնել ու հանձնել այն մարմիններին, որոնք իրավասու են այդ զենքը կրելու և պահպանելու։ Ժողովրդի ձեռքին զենք մնալը բերում է այնպիսի տեսարանների, որոնց, ցավոք սրտի, ականատես ենք լինում ժամանակ առ ժամանակ։ Ես տեղին եմ համարում նախագահի մտահոգությունը, բայց որ ոստիկանությունն այդ ուղղությամբ աշխատանք չի տանում կամ աշխատանքները վատ են, այդպիսի բան ես չեմ կարող ասել։

Իսկ ինչո՞ւ է վատացել իրավիճակն այդ առումով։ Սերժ Սարգսյանը նշեց, որ շատացել են այդպիսի դեպքերը։

Օբյեկտիվ ու սուբյեկտիվ պատճառներ կան։ Այս տիպի հանցագործություններն այսօր կրում են զուտ սոցիալական բնույթ։ Ես չեմ տեսնում, որ սա հանցագործ աշխարհի միջև ինչ-որ հարցերի պարզաբանման հետ է կապված։ Անկյունաքարը, հիմնական պատճառը սոցիալական հարցերն են, այդ մարդիկ սոցիալական հարցեր են լուծում, որը ծնել է ոչ թե ոստիկանությունը, կամ ինչ-որ մեկը, այլ դա մեր իրավիճակն է, որ ունենք։ Անցումային իրավիճակ է, պարզաբանումների շրջան է, ֆինանսական, տնտեսական ոլորտների հետ կապված միմյանց նկատմամբ ինչ-որ հարաբերությունների պարզաբանում է, տարբեր ոլորտներ իրենցով կարգավորելու ցանկություն է։ Կարծում եմ՝ սրանք էլ ժամանակավոր բնույթ են կրում։ Պետությունն էլ, այս ամեն ինչն էլ օրգանիզմ են, և ինքնըստինքյան այդ ամենը կտանի բուժման։ Մի օր այս ամենը կվերանա։ Բայց որ նախագահի ցուցումը տեղին էր, պետք էր, որ ոստիկանությունն էլ մշտապես դա արել է, էսօր էլ է անում և շարունակելու է անել, ես դրանում չեմ կասկածում։ Ուղղակի նախագահը պահանջեց էլ ավելի ակտիվացնել, իսկ թե ինչ միջոցներով, ընթացքում կարծում եմ պարզ կլինի։ Որոշակի խստացումներ, բնականաբար, պետք է լինեն, ոստիկանությանը պետք է թույլ տան մի քիչ ավելի ակտիվ աշխատանքներ տանել և ամեն րոպե քննադատության թիրախ չդարձնել։

Քննադատել ասելով ո՞ւմ նկատի ունեք։

Լրատվամիջոցներին, հանրությանը։ Ոստիկանության յուրաքանչյուր արարք դիտարկում են որպես բռնություն, դիտարկում են օրենքի սահմաններից դուրս խախտում, իրավաչափության հետ կապված խնդիրներ են անընդհատ առաջ քաշում, բայց ուղղակի սպիտակ ձեռնոցներով այդ ուղղությամբ չեք պայքարի։

Զինապարտության մասին օրենքը բավական բուռն քննարկումներով, քննադատություններով և փոխադարձ մեղադրանքներով ընթացավ։ Ինչպե՞ս եք գնահատում։

Անձնական վիրավորանքներն ընդհանրապես չեմ ընդունում, այս արհեստական ոգևորվածությունն ընդհանրապես չեմ ընդունում, կարծում եմ, որ Զինծառայողի մասին օրենքը բավական դրական դրույթներ պարունակում է և մի քայլ է դեպի առաջ։ Իր հիմնական նպատակը կոռուպցիոն ռիսկերը նվազեցնելն է, որպեսզի բոլորը հավասար լինեն օրենքի առաջ։

Պաշտոնյաների որդիները նո՞ւյնպես։

Իհարկե, նաև պաշտոնյաների որդիները։ Մոտ ժամանակներս կունենանք հնարավորություն, որ որևէ մեկը զինվորական ծառայությունից խուսափելու հնարավորություն այլևս չի ունենա։ Եվ բոլորը կհասկանան, որ եթե ծնվել են և ապրում են այստեղ, պետք է իրենց հայրենասիրական պարտքն այս երկրի համար կատարեն։ Հողը թողնել-փախչելով չէ։ Հասկանում եմ, պատերազմ է, զոհեր էլ կլինեն, շատ լավ եմ գիտակցում, բայց ո՞ր երկիրն է մեր կարգավիճակում եղել ու էդպես դատողությամբ առաջ շարժվել։ Այսօր կարևորագույն խնդիր ունենք մեր երկրի անկախությունը, անվտանգությունը պահպանելու, ինչու չէ, ազգային արժանապատվությունը։

Համամի՞տ չեք, որ հենց պաշտոնյաների որդիները պետք է ծառայեն և հենց առաջին գծում։

Համամիտ եմ։ Բոլորը պետք է գնան, եթե նրանք այդ տեղիքը  չտային, այսօր այս քննարկումն այդ աստիճան չէր թեժանա։



Загрузка...

Հեղինակի մասին

armhing

armhing