Լրահոս

Անհայտ, բայց միլիոնատեր պատգամավոր. ավելի քան 150 միլիոն

Այն որ ՀՀ Ազգային Ժողովի պատգամավորների բավական մեծ հատվածը որևէ աղերս չունի օրենսդիր գործունեության հետ՝ կարծում ենք գիտեն բոլորը, սակայն մեր հայրենի ԱԺ-ում կան

 

mkrtchyan-3-02-15

politik.am — Այն որ ՀՀ Ազգային Ժողովի պատգամավորների բավական մեծ հատվածը որևէ աղերս չունի օրենսդիր գործունեության հետ՝ կարծում ենք գիտեն բոլորը, սակայն մեր հայրենի ԱԺ-ում կան պատգամավորներ, որոնք ոչ միայն օրենսդիր գործունեությամբ չեն զբաղվում այլև նրանց չեն էլ ճանաչում: Կան պատգամավորներ, որոնց անգամ Ազգային Ժողովի անցուդարձը լուսաբանող պրոֆեսիոնալ լրագրողները չեն ճանաչում: Նման պատգամավորները հիմնականում հավաքված են իշխող ՀՀԿ-ի ԱԺ խմբակցությունում: ԱՆհայտ պատգամավորներից մեկն էլ Վահրամ Պատվականի Մկրտչյանն է: Նա ԱԺ պատգամավոր է դարձել 2014 թվականին ՀՀԿ համամասնական ցուցակով:

Վահրամ Մկրտչյանը ծնվել է 1963թ. օգոստոսի 7-ին Վարդաբլուր գյուղում (Արագածոտնի մարզ):  1985թ. ավարտել է Երեւանի պետական համալսարանի ֆիզիկայի ֆակուլտետը,  1988թ.՝ ԵՊՀ ասպիրանտուրան: Ֆիզիկոս: Ֆիզիկամաթեմատիկական գիտությունների թեկնածու:  1988-2000թթ. եղել է ԵՊՀ ֆիզիկայի ֆակուլտետի ավագ գիտաշխատող: 2000-2004թթ.` ՀՀ պետական գույքի կառավարման նախարարության անշարժ գույքի կառավարման վարչության պետ: 2004-2006թթ.` ԵՋԿ ՓԲԸ «Մաշտոց» մասնաճյուղի տնօրեն: 2006 թվականից՝ ԵՊՀ  ֆիզիկայի ֆակուլտետի ավագ գիտաշխատող: 2007 թվականից «Բարեպաշտ սերունդ» հիմնադրամի տնօրենն է (հասարակական հիմունքներով):  1994-2001թթ. եղել է ԱԺՄ կուսակցության անդամ, 1997-2001թթ.՝ ԱԺՄ վարչության քարտուղար: ՀԺԱՄ կուսակցության հիմնադիր անդամ է (2001թ.): 2004-2009թթ. եղել է ՀԺԱՄ կուսակցության նախագահի տեղակալ, 2009-2012թթ.՝ կուսակցության վարչության նախագահ: 2012թ.՝ ՀՀԿ անդամ:

Պարզվում է, սակայն որ գրեթե ամբողջ կյանքում պետական համակարգում աշխատած սույն երիտասարդ պատգամավորը բավական կարողության տեր է: Ըստ Բարձրաստիճան պաշտոնատար անձանց էթիկայի հանձնաժողով ներկայացված հայտարարագրի իր դրամական միջոցները կազմում են՝ 100 միլիոն դրամ և 100 հազար դոլար: Պատգամավորն ունի նաև երկու բնակարան բազմաբնակարան շենքում: Մեկ տարվա ընթացքում ստացել է ավելի քան 7 միլիոն դրամ աշխատավարձ:

Ի դեպ ըստ parliamentmonitoring կայքի պատգամավորը իր ամբողջ գործունեության ընթացքում ընդամենը 9 անգամ է հարց տվել և 88 անգամ կողմ է քվեարկել ու ոչ մի անգամ դեմ:

Իրականում կարելի է դասեր քաղել Վահրամ Մկրտչյանից, քանի որ նա իր ամբողջ կյանքում զբաղեցնելով ընդամենը ՀՀ պետական գույքի կառավարման նախարարության անշարժ գույքի կառավարման վարչության պետի պաշտոն և որոշակի ժամանակ ջրմուղ կոյուղու մասնաճյուղի պետ կարողացել է բավական գումարներ կուտակել: Գուցե նա կիսվի իր փորձով և շատերը կարողանան գնալ իր ճանապարհով:

Միացեք մեր ֆեյսբուքյան էջին և հետևեք ամենաուշագրավ նյութերին


Կիսվիր ընկերներիդ հետ

Կայքում տեղ գտած մտքերն ու տեսակետները հեղինակի սեփականությունն են և ոչ միշտ են համընկնում ՀԻՆԳ.am-ի խմբագրության տեսակետների հետ:

loading...

Հրապարակող՝

armhing

armhing