Էդ մարդկանց խելքները չի հասե՞լ, որ ստորագրել են

57

Էներգետիկայի ոլորտում մեր խնդիրները, որքան էլ տարօրինակ հնչի, նորից կոռուպցիոն բնույթի են։ Այս մասին, նախօրեին Սանկտ Պետերբուրգում հայ գործարարների հետ հանդիպման ժամանակ նշել է ՀՀ վարչապետ Նիկոլ Փաշինյանը:

«Երբ ՌԴ մեր գործընկերների հետ խոսում ենք, իրենք շատ զարմանում են իմ տված մի տեղեկատվության վրա։ Երբ իրենք ասում են, որ Ռուսաստանը Հայաստանին ամենաէժան գազն է վաճառում՝ սահմանին  150 դոլարով, ես ասում եմ, որ կներեք, բայց ՀՀ քաղաքացին համաձայն չէ այդ կարծիքի հետ, քանի որ մարդկանց տներ այն մտնում է 300 դոլարով: Նրանք զարմանում են, թե ինչպես կարող է նման բան լինել, իսկ ես ասում եմ, որ նման բան կա»,-ասաց Փաշինյանը:

Նա անդրադարձավ նաեւ գազալցակայաններին՝ նշելով. «Օրինակ, Հայաստանում գազալցակայանների կողմից սպառված գազը նախորդ տարվա նույն ժամանակահատվածի հետ համեմատ կրկնակի ավելացել է: Իսկ ի՞նչ է փոխվել, փոխվել է այն, որ զգացել են, որ իրենց հետեւում են: Պետք է այդ հարցերով զբաղվենք եւ զբաղվելու ենք: Նույնը վերաբերում է էներգետիկային: Էներգետիկ ոլորտում մեր միջազգային գործընկերների հետ հարաբերություններում, ցավոք, անընդհատ հանդիպում ենք փաստի, որ Հայաստանի շահերն արհամարհված են:

Պարզվում է, որ որեւէ էներգետիկ ընկերություն ցանկանում է օբյեկտ կառուցել Հայաստանի ժողովրդի հաշվին, ասում է, որ օբյեկտը կառուցել է 100 դրամով, իրականում պարզվում է, որ կառուցման գինը 50 դրամ է։ Ասում է՝ արտադրած էլեկտրաէներգիան պետք է արժենա երկու դրամ,  բայց իրականում դա պետք է արժենա մեկ դրամ, հետո ասում է, որ Հայաստանը պետք է պարտավորվի 20 տարի այդ էլեկտրաէներգիան գնել, եթե նույնիսկ դրա պահանջարկը չկա։

Պարզվում է, որ Հայաստանում գտնվել են մարդիկ, որոնք այդ թուղթը ստորագրել են ու համաձայնության են եկել: Ակնհայտորեն Հայաստանի շահերն այս հարցերում արհամարհված են»,-հայտարարեց ՀՀ վարչապետը:

Նրա խոսքով, էներգետիկ ոլորտում կան վարկային ծրագրեր, որոնք չեն իրագործվում ոչ Հայաստանի մեղքով, բայց Հայաստանը ամեն տարի պարտաճանաչ վճարում է դրանց սպասարկման համար. «Պարզվում է, որ Հայաստանում եղել են մարդիկ, որոնք ստորագրել այդ պայմանագրերը: Էդ մարդկանց խելքները չի հասե՞լ, որ ստորագրել են։ Կներեք, չեմ հավատում, լավ էլ իմացել են՝ ինչ են ստորագրում։ Այստեղ իրենց հետաքրքրել է իրենց գրպանի շահը:

Էներգետիկան անկյունաքարային նշանակության ոլորտ է, եւ պատրաստվում ենք կարգի բերել: Միջազգային գործընկերներին ասում ենք, որ պետք է բանակցենք. այնտեղ, որտեղ Հայաստանի շահը պահպանված չէ, ուղղակի կկանգնեցնենք պրոցեսները, որեւէ մեկին թույլ չենք տա, որ Հայաստանի շահն արհամարհի»,- ընդգծեց ՀՀ կառավարության ղեկավարը՝ հավելելով, որ էներգետիկայի շուրջ Ռուսաստանի գործընկերների հետ եւս համագործակցված աշխատանք է տարվում:



Загрузка...

Hing.am is Stephen Fry proof thanks to caching by WP Super Cache