Լրահոս

Հայաստանում փորձում են ահաբեկել սփյուռքահայ գործարարին` մահափորձ կատարելով նրա ընկերոջ դեմ, հաշվեհարդարը շարունակելով անասուններին սատկացնելով

 

Մահափորձ են կատարել 1985 թվականից Հայաստանում հաստատված լիբանանահայ գործարար, մասնագիտությամբ ռեժիսոր Օհաննես (Հովհաննես) Ստեփանյանի ընկերոջ ու գործընկերոջ` «ԳեղԱստղ» ծրագրի կազմակերպչական գծով տնօրեն Տիգրան Եղոյանի նկատմամբ, բարեբախտաբար, անհաջող: Երկու տեղից դանակահարել են սփյուռքահայ ֆերմերի հորթին, սատկացրել շներից երկուսին… Սա ավելին է, քան անձի ու նրա սեփականության նկատմամբ հանցագործությունը, անկախ նպատակից, այն փաստացի ուղղված է Հայաստանի Հանրապետության տնտեսության ու մեր երկրի զարգացման դեմ: Օհաննես Ստեփանյանը և Տիգրան Եղոյանն իրենց և իրենց սեփականության նկատմամբ կատարվածի մասին հայտնեցին «Նոյյան Տապան» լրատվական կենտրոնում այսօր հրավիրված մամուլի ասուլիսում:
Մինչ կատարվածի մանրամասները ներկայացնելը, նշենք, որ Օհաննես Ստեփանյանն իր ընկերոջ հետ զբաղվում է անասնապահությամբ, մասնավորապես` ոչխարի և այծի հայկական գրեթե վերացած ցեղատեսակների (այլ ցեղատեսակների համեմատ մի շարք առավելություններ ունեցող) անասնագլխաքանակի վերականգնման հայրենանվեր գործով, նաև` մեղվապահությամբ, գյուղական զբոսաշրջության զարգացմամբ: ՀՀ էներգետիկ ենթակառուցվածքների և բնական պաշարների նախարարության համակարգում գտնվող «Բարձրավոլտ էլեկտրացանցեր» ՓԲ ընկերության (ԲԷՑ) կողմից իր սեփականության նկատմամբ թույլ տրված ոտնձգությունների կապակցությամբ Օհաննես Ստեփանյանը համեմատաբար վերջերս դիմել է ՀՀ վարչապետ Կարեն Կարապետյանին: Նոր կառուցված, իրար ետևից շարված բազմաթիվ ՀԷԿ-երի գործունեության հետևանքով որոշակի հատվածում Եղեգիս գետի ջրային հոսքի խաթարման, նվազման կապակցությամբ դիմել է ՀՀ բնապահպանության նախարար Արծվիկ Մինասյանին, իր իրավունքների, օրինական շահերի ոտնահարման, իր սեփականության նկատմամբ կատարվող ոտնձգությունների կապակցությամբ դիմել է ՀՀ մարդու իրավունքների պաշտպանին, ինչպես նաև այլ մարմինների:
«Ստացանք որոշ նամակների պատասխաններ, կարող եմ ասել, որ ստացանք 4 նամակ, որոնցից 3-ը գրավոր են, մեկը, կարող եմ ասել, խոսքով է և գործնական,- ասաց Օհաննես Ստեփանյանը:- Երեքից 2-ն իրենց բովանդակությամբ ավելի շատ սուտ կարող եմ անվանել, մեկն, ընդհանրապես, չեզոք, իսկ չորրորդը` ահաբեկչական, որի մասին հստակ հայտարարելու ենք:
Առաջին նամակը, որ ստացել ենք ի պատասխան, եղել է բնապահպանության նախարարությունից: Մենք գրել էինք այն 19 ՀԷԿ-երի մասին, որոնց հետևանքով մեր կողքից անցնող գետը, ընդհանրապես, վերածվել է առվի, չորանում է, որին, ի պատասխան, ստացել ենք նամակ, որում նշված է, որ 9 ՀԷԿ-եր կան (չնայած իրականում 19-ն են), հավանաբար, այստեղ սկզբի «1» նիշը մոռացել են կամ ուզեցել են մոռանալ: Երկրորդ խնդիրը նամակի վերջում եղած այն բացատրությունը կամ պատասխանն է, թե ջուրը կարող է պակասած լինել, որովհետև կա նաև ոռոգման խնդիր»:
Հիմա, կարծում ենք, արդեն հասկանալի է, թե սփյուռքահայ գործարարն ինչու էր իր բովանդակությամբ ավելի շատ սուտ համարում նաև ՀՀ բնապահպանության նախարարությունից ստացված պատասխանը: Ստացվում է, որ նախարարությունում անտեղյակ են, որ այնտեղ իրականում 19 ՀԷԿ կա (եթե, իհարկե, պատասխանում նշված թիվը /9/ վրիպակի հետևանք չէ), կամ էլ ստել են: Ըստ Օ. Ստեփանյանի, իրականությանը չի համապատասխանում նաև պատասխանի այն մասը, թե ջուրը կարող է պակասած լինել, որովհետև կա նաև ոռոգման խնդիր, քանի որ գետի հիշյալ վիճակն իրականում անհաշվենկատ կերպով այդքան մեծաթիվ ՀԷԿ-երի կառուցման թույլտվություն տալու, դրանց կառուցման ու շահագործման հետևանք է:
Մյուս պատասխանը, որն իր բովանդակությամբ ավելի շատ սուտ է, վարչապետ Կարեն Կարապետյանին Օհաննես Ստեփանյանի ուղղած դիմումին ՀՀ էներգետիկ ենթակառուցվածքների և բնական պաշարների նախարարությունից տրված պատասխանն է: Այս խայտառակ պատասխանին առաջիկայում կանդրադառնանք առանձին ու հանգամանալի հրապարակմամբ:
Չեզոք պատասխանը ՀՀ մարդու իրավունքների պաշտպանից ստացված պատասխանն է: Դրա համաձայն, քանի որ հիշյալ նախարարության համակարգում գտնվող «Բարձրավոլտ էլեկտրացանցեր» ՓԲ ընկերության հետ կապված խնդիրը դատական գործընթացում է, իրենք չեն միջամտում դրան:
Իսկ վերջին նամակը Օհաննես Ստեփանյանը ստացել է այստեղ գործ անող առևտրականների հետ մի քանի օր առաջ տեղի ունեցած «պատահական» հանդիպման ընթացքում:
«Նրանցից մեկը,- շարունակեց սփյուռքահայ գործարարը,- պատմեց, թե, գիտես ինչ, կար մեկ ուրիշ վաճառական, որին իրեն մի օր մի պետական պաշտոնյա ասել է` եղե՞լ է, արդյոք, երբևիցե, որ քո ավտոմեքենայի անիվը, հենց այնպես, միանգամից տրաքի, եղե՞լ է, որ քան տան առաջ միանգամից աղբակույտ հայտնվի, և այդպես շարունակ… Եվ վերջում ասել է` եթե դրանցից որևէ մեկն եղել է, ուրեմն ժամանակն է, որ երկիրը թողնեք ու գնաք: Մենք հայտարարում ենք, որ երկիրը չենք թողնելու և գնալու, չնայած սրանից ավելի սարսափելի բաներ են արդեն տեղի ունեցել ու շարունակում են ունենալ»:
Այդ ավելի սարսափելի բաների մասին պատմեց Օ. Ստեփանյանի ընկերն ու գործընկերը` «ԳեղԱստղ» ծրագրի կազմակերպչական գծով տնօրեն Տիգրան Եղոյանը, որը, սակայն, մինչ հարցին անդրադառնալը, պատմեց հետևյալի մասին.
«Բառացիորեն 1 ամիս առաջ եղել եմ Վրաստանում: Վրաստանում պետավտոտեսչության աշխատողներն իմ մեքենան կանգնեցրեցին: Ոստիկանն ինձ մի այսպիսի հայտարարություն արեց` սա Վրաստանն է, սա ձեր Հայաստանը չէ, սա օրենքի երկիր է: Դժբախտաբար, այդ պահին Վրաստանի ոստիկանության աշխատողը ճիշտ էր, և ես ինձ շատ նվաստացած զգացի, որ Հայաստանում ինչ է կատարվում: Կատարվում են ոտնձգություններ, վարվում է սխալ և ապօրինի քաղաքականություն»:
Տիգրան եղոյանը ներկայացրեց, թե ինչ ոտնձգություններ, ավելի ճիշտ, ահաբեկչական գործողություններ են կատարվել իր և իրենց նկատմամբ: Թե ովքեր են դրանց ետևում կանգնած, ըստ Եղոյանի, իրավապահ մարմինների պարզելու խնդիրն է:
«Ես ներկայացնում եմ փաստերը,- ասաց «ԳեղԱստղ» ծրագրի կազմակերպչական գծով տնօրենը:- Գնացել եմ Շատին, որտեղ մեր անասնագոմերն է, գիշերը մոտավորապես 11-ի կողմերը: Երբ մեքենայով մոտենում էի գոմերին, նկատեցի, որ մեքենայի ետևից լույս կա… Եվ ինչ տեղի ունեցավ. եռաֆազ հոսանքատարը (մալուխը) միանգամից ընկավ մեքենայի վրա»:
Տ. Եղոյանի պատմելով, լույսը, որը նկատել է, ինչ-որ մեկի լապտերի լույսն է եղել, լարման տակ գտնվող մալուխն ընկել է իր վարած «ՈՒԱԶ» մակնիշի ավտոմեքենայի վրա, ինքն անմիջապես կանգնեցրել է «Վիլիսը» և իջել:
«Մեքենայի տակ,- շարունակեց նա,- գետինն ամբողջությամբ ջուր էր և բենզին: Սա ի՞նչ է նշանակում… Ոստիկանությանը չդիմեցի մեկ պատճառով, որովհետև վստահ չեմ, որ մեր իրավապահներն այս գործերին անաչառ լուծում կտան, որովհետև մենք տեսել ենք… Դրանից առաջ եկել եմ մեր անասնագոմեր, տեսել, որ դռան կողպեքը ջարդված է, ներսն ամբողջությամբ` ավերված: Դիմել եմ ոստիկաններին, եկել են ոստիկանները Վայոց Ձորից: Եվ ինչ են ասում` սա զգուշացում է ձեզ: Ի՞նչ է նշանակում զգուշացում… Վերջերս երեկոյան ժամը յոթնանցկեսին մեր աշխատողներից զանգեցին, ասացին, որ մեր սեփական հորթերից չկան: Եկել եմ Գեղարքունիքի մարզի Աստղաձորի այդ սարը, որտեղ մեր ամառային արոտավայրում մեր անասուններն են գտնվում, կես ժամ հետո զանգեցին, ասացին, որ այդ հորթն ընկած է գետնին: Գնացել ենք, տեսել ջարդված ետևի վերջույթներն անասունի և երկու տեղով դանակահարված: Սա, նորից եմ կրկնում, ահաբեկչություն է: Զանգահարել եմ Գեղարքունիքի ոստիկանություն, հայտարարել, որ նման ոտնձգություն է կատարվել: Ոչ մի ոստիկան չի ժամանել: Հաջորդ օրը նոր` ոստիկանությունը եկել է դեպքի վայր: Եվ ինչ են ասում` միգուցե գյուղացիներն են… Ես ամենայն պատասխանատվությամբ հայտարարում եմ` այն գյուղացին, որն անասուն է պահում, գիտի գյուղի հոգսերը, պրոպլեմները, ընդունակ չէ նման բարբարոսության: Սա հրեշավոր բան է»:
«Դրանից հետո,- շարունակեց Օհաննես Ստեփանյանը,- մեր ձմեռային գոմի վրա (Վայոց Ձորի մարզում) գրվել է` «Վաճառվում է հորթի միս»»:
Դեպքը տեղի է ունեցել Գեղարքունիքի մարզում, Մարտունու տարածաշրջանում, դեպքից 2 օր հետո հիշյալ գրությունը կատարվել է Վայոց Ձորի մարզում գտնվող Օ. Ստեփանյանի անասնագոմի վրա, ինչը վկայում է, որ սփյուռքահայ գործարարի նկատմամբ, իրոք, առկա է քրեական բնույթի հետապնդում, ինչ-որ մեկը կամ ինչ-որ մարդիկ ուզում են, որ նրանք վերջ տան իրենց տնտեսությանը և հեռանան այդտեղից: Մի՞ թե այս ամենը «Բարձրավոլտ էլեկտրացանցեր» ՓԲԸ-ի թույլ տված ապօրինության դեմ կամ ՀԷԿ-երի հետ կապված Օհաննես Ստեփանյանի բողոքի հետևանքը չէ… Եթե ոչ, ապա ո՞ւմ ձեռքի գործն է:
Տիգրան Եղոյանի տեղեկացմամբ, իր մեքենայի վրա ընկած մալուխի միջով մոտ 40 սանտիմետրը մեկ մետաղյա ձողեր են անցկացված եղել, որպեսզի հոսանքը հաղորդի մեքենային, սակայն իր բախտը բերել է, քանի որ «Վիլիսի» թափքի վերին մասը ծածկված է եղել ծածկոցով, որը մեկուսիչ է, հոսանք չի հաղորդում:
«Հինգ հարյուր ոչխարն ո՞ւմ տնտեսությանը պետք է խանգարեր, ես չեմ կարող դա հասկանալ,- ասաց սփյուռքահայ գործարարը:- Մնացած հարցերը մի քիչ ավելի այլ տեղ են տանում: ԲԷՑ-ի և մնացած հարցերով մենք դիմել ենք ոստիկանություն: Ոստիկանությունը որոշեց միջնորդել մեր և ԲԷՑ-ի միջև: Ուրեմն Տիգրանը գնացել է բանակցությունների, և այնտեղ եղել են նաև դատախազության ներկայացուցիչներ, նաև մնացածը, որպեսզի բանակցեն, տեսնեն ինչ է կատարվել, ինչ ավերածության մասին է խոսքը: Եվ հանկարծ, զարմանալի պատահականությամբ, այդ բոլորը որոշում են Տիգրան Եղոյանին դիմել որպես Եսայան, հետո Եսայանը դարձավ Ալբերտիչ: Մենք այդտեղ որ նոր սկսեցինք մեր գործը, մեզ համար ասում էին` պարսիկ է եկել, արաբ է եկել… Հետո տարօրինակորեն այդ «արաբ» անվանումը դարձավ լուրջ մականուն: Վերջերս այդ մտահոգությունից, երբ որ հայտնվեցին այդ անվանումները` Եսայան, Ալբերտիչ, պարզեցինք, որ ժամանակին եղել է մի օրենքով գող` Տիգրան Ալբերտի Եսայանը, որը կոչվել է արաբ (մականունը): Հիմա ո՞ւր են տանում, ի՞նչ են ուզում` ես չեմ հասկանում»:
Օհաննես Ստեփանյանը պատմեց նաև իր ընկերոջ վերաբերյալ պետական մարմիններից մեկի պաշտոնյայի գրած ու վերջինիս տգիտության մասին վկայող պատասխանի մասին, որում Տիգրան Եղոյանի առնչությամբ գրված է` «Լիբանան քաղաքի քաղաքացի…»:
Կարճ ասած, ինչպես արդեն հասկանալի է, ոմանք իրենց առջև խնդիր են դրել սփյուռքահայ գործարարին ու նրա ընկերոջը «արտաքսել» այդ կողմերից կամ, ինչպես ասում են նման դեպքերում, «խռիկ» տալ: Նրանց նպատակը` պատժե՞լն է, ԲԷՑ-ի կողմից իր տնտեսական ձեռնարկի ապօրինի իրականացման ճանապարհին հայտնված խոչընդոտը վերացնե՞լը, թե՞ երկուսն էլ միաժամանակ, չգիտենք, իրավապահ մարմինների պարզելու խնդիրն է, սակայն մի բան հաստատ կարող ենք ասել` այդպիսի հանցագործների ու սրիկաների համար որևէ նշանակություն չունի, որ այդ դեպքում սփյուռքահայ գործարարի հիմնած տնտեսությունը կարող է ի չիք դառնալ, ոչխարի և այծի գրեթե վերացած հայկական ցեղատեսակները կորստից փրկելու, մեղվաբուծության և գյուղական զբոսաշրջության զարգացման նրա սկսած ծրագրերին կարող է վերջակետ դրվել: Այո՛, նրանց համար որևէ նշանակություն չունի ու բնավ չի հետաքրքրում, որ սփյուռքահայ գործարարն ու նրա ընկերը մի օր զզվելով կամ պայքարելուց հոգնելով, կարող են որոշել Հայաստանից հեռանալ, որ արտերկրից բազմաթիվ սփյուռքահայ գործարարներ իմանալով այս ամենի մասին, կարող են ընդհանրապես հրաժարվել Հայաստան գալու, այստեղ գործարարությամբ զբաղվելու կամ այս երկրում ներդրումներ կատարելու մտքից: Եթե մի փոքր խորը մտածենք, կատարվածը ահաբեկչություն է ոչ միայն Տ. Եղոյանի ու սփյուռքահայ գործարարի տնտեսության, այլև Հայաստանի Հանրապետության տնտեսության դեմ, որով պարտավոր են ու պետք է զբաղվեն նաև ՀՀ ազգային անվտանգության ծառայությունը, անձամբ վարչապետն ու նախագահը: Բայց մենք, իհարկե, մտապատրանքներ չունենք, մենք Հայաստանում ենք ապրում…
Ի հեճուկս իրենց և իրենց սեփականության, տնտեսության դեմ ոտնձգած, իրենց նկատմամբ հետապնդումներ սկսածների, Օհաննես Ստեփանյանը և Տիգրան Եղոյանը հրապարակայնորեն հայտարարում են, որ իրենք չեն ընկճվելու, չեն հեռանալու Հայաստանից, շարունակելու են իրենց ծրագրերը և պայքարը մինչև վերջ, ավելին` ՀՀ-ում ապրող մյուս սփյուռքահայերին և, ընդհանրապես, Հայաստանի ողջ բնակչությանը կոչում են հետևել իրենց այս օրինակին:
Ընդամենը 3 օրից սկսվելու է Հայաստան-սփյուռք 6-րդ համահայկական համաժողովը, դրանից առաջ սփյուռքահայ գործարարի նկատմամբ տեղի ունեցածը կատարյալ խայտառակություն է այդ համաժողովի կազմակերպիչ ՀՀ կառավարության և, ընդհանրապես, իշխանությունների համար: Իշխանությունների կողմից այսպիսի վերաբերմունքի դեպքում չափազանց դժվար է հավատալ, թե նրանց նպատակը կամ, թեկուզ, նպատակներից մեկը Հայաստանի ու Սփյուռքի ջանքերի մեկտեղմամբ Հայաստանն ու նրա տնտեսությունը ներկայիս դժվարին վիճակից հանելն է: Հավանաբար մտածում են, թե, ասենք, 100 «ախպարի» մեջ, ինչպես էլ լինի, 1-2-ը միամիտ, Հայաստանում առկա իրավիճակին անտեղյակ ու չափազանց հայրենասեր կլինեն, համոզենք նրանց, ներդրումներ կատարեն, իսկ հետո մեր տղաների, ախպեր տղերքի համար փայ մտնելն ու աստիճանաբար բիզնեսին տիրանալը դժվար չի լինի, քանի՛-քանիսի ունեցվածքին են տիրել, կերել ու մարսել… Վստահեցնում ենք այդպիսի ախորժակ ունեցողներին` գալու է այն օրը, երբ այլևս չեք կարողանալու զխտել, կոկորդներիդ է կանգնելու:

Կիսվիր ընկերներիդ հետ


Загрузка...

Հեղինակի մասին

armhing

armhing