good-banner
Լրահոս

ՀՀԿ-ն սկսեց ծաղրել Կարեն Կարապետյանին

 

arm147378026532

lragir.am — Հանրապետական կուսակցությունը գրոհ է սկսել նորանշանակ վարչապետ Կարեն Կարապետյանի հանդեպ: Այդ գրոհն արտաքուստ ունի գովաբանության եւ փառաբանության տեսք: ՀՀԿ-ականները աջ ու ձախ հայտարարում են, թե Կարեն Կարապետյանը շատ արագ եւ բարեհաջող փոխելու է Հայաստանի տնտեսության վիճակը, ինչը շատ արագ զգալու են նաեւ քաղաքացիները:
Բայց, այդ գովաբանության եւ փառաբանության մեջ ի հայտ են գալիս տարրեր, որոնք սկսել են ուրվագծել առերեւույթ գովաբանության տակ թաքնված ծաղրը: Օրինակ, ՀՀԿ ներկայացուցիչներից մեկը հայտարարել է, թե Կարեն Կարապետյանն այնքան լավ կառավարիչ է, որ Հայաստանը կդարձնի «Սինգապուրի նման մի բան»:
Բանն այն է, որ հնարավոր չէ Կարապետյանի վարչապետությունը դեռ մեկնարկից անլրջացնել ավելի, քան այդօրինակ հայտարարություններն այն մասին, որ նա Հայաստանը կդարձնի Սինգապուր:
Ու դա անում է ոչ թե ընդդիմությունը, ոչ թե լրատվամիջոցները, ոչ թե քաղաքական երգիծանքի վարպետները (եթե այդպիսիք կան Հայաստանում), այլ Հանրապետական կուսակցության ներկայացուցիչները:
Բանը Կարապետյանի կարողունակությունը, կառավարչական հատկանիշները չեն, կամքն ու ցանկությունը չէ, բանը Հայաստանի եւ Սինգապուրի տարբերություններն են, խորքային, ելակետային տարբերությունները: Ավելի շուտ, գործնականում նմանությունների իսպառ բացակայությունը:
Այն, որ ՀՀԿ-ականները դա կարող են չպատկերացնել, իհարկե աներեւակայելի չէ: Ի վերջո, եթե այդ ուժը պատկերացներ Հայաստանի խնդիրները, ապա հազիվ թե Հայաստանը հասցրած լիներ ներկայիս գրեթե աղետալի վիճակին: Այդ կուսակցության մեծամասնությունը մեղմ ասած չի փայլում իմացականության եւ ինտելեկտի պաշարներով, հետեւաբար «ազատ» է համեմատությունների մեջ: Բայց, բանն այն է, որ օգտվելով իր այդ «ազատությունից», ՀՀԿ մեծամասնությունը փաստորեն ծաղրի առարկա է դարձնում Հայաստանի նոր վարչապետի գործունեության մեկնարկը եւ գործունեությունն ամբողջությամբ:
Թեեւ, դա էլ զարմանալի չէ, նկատի ունենալով, թե ինչ հեռանկար է մատնանշել նոր վարչապետի թեկնածությունն առաջադրող Սերժ Սարգսյանը: Նա հայտարարել է, որ Կարեն Կարապետյանի հետ երկար է զրուցել նրա պաշտոնավարման մասին, այդ թվում ՀՀԿ-ին նոր ոգի հաղորդելու վերաբերյալ: Խոշոր հաշվով, Սերժ Սարգսյանը հայտարարել է, որ վարչապետի փոփոխությունն ունի ավելի լայն համատեքստ, որը ներառում է ՀՀԿ տրանսֆորմացիան:
Տրամաբանական է, որ դրանից հետո Կարեն Կարապետյանը պետք է դառնար ՀՀԿ թիրախ: Իհարկե ոչ բացահայտ, դա կլիներ շատ ռիսկային, բայց ՀՀԿ-ն արդեն իսկ ցուցաբերել է Կարապետյանին թիրախավորելու մտադրության մի քանի դրսեւորում:
Մասնավորապես, ՀՀԿ խորհրդում նրա թեկնածությունը հաստատելուց հետո ՀՀԿ խորհրդարանական խմբակցության ղեկավար Վահրամ Բաղդասարյանը հայտարարեց, թե պարզ չէ՝ կշարունակի Կարապետյանը 2017-ից հետո, թե ոչ, քանի որ դա պետք է որոշի ՀՀԿ-ն՝ գնահատելով նրա գործը: Բաղդասարյանը նաեւ հայտարարել էր, թե իրենք նախորդ կառավարության հետ էլ հեռահար ծրագրեր ունեին, բայց դա ոչինչ չի նշանակում:
Միաժամանակ, Կարապետյանին արված լուրջ ակնարկներից հետո, ՀՀԿ-ն որոշեց նաեւ մյուս կողմից անլրջության որոշակի մթնոլորտ ձեւավորել նրա գործունեության շուրջ, հենց սկզբից, թերեւս դրանով իսկ Կարապետյանին էլ ավելի մեծ կախվածության մեջ դնելով իրենից: Այլ կերպ ասած, ՀՀԿ-ն «անլրջության ոգի» է հաղորդում Կարապետյանի վարչապետությանը, քանի դեռ նա չի հասցրել «նոր ոգի» հաղորդել ՀՀԿ-ին:

Загрузка...

Միացեք մեր ֆեյսբուքյան էջին և հետևեք ամենաուշագրավ նյութերին


Կիսվիր ընկերներիդ հետ

Կայքում տեղ գտած մտքերն ու տեսակետները հեղինակի սեփականությունն են և ոչ միշտ են համընկնում ՀԻՆԳ.am-ի խմբագրության տեսակետների հետ:

loading...

Հրապարակող՝

hing.am

hing.am