Մոսկվայից եկող վտանգն ու Պուտինի թիվ մեկ սպառնալիքը

455

hayeli.am — Սրվում է իրավիճակը Ռուսաստանի և ԱՄՆ-ի միջև՝ Լեհաստանի արևելքում ամերիկյան ռազմակայանի հնարավոր ստեղծման ֆոնին:

Լեհաստանի պաշտպանության նախարարության մասնագետների կողմից մշակված փաստաթղթի համաձայն՝ Վարշավան պատրաստ է ամերիկացի զինվորականների տեղակայման նպատակով 2 միլիարդ դոլար տրամադրել:

Այս քայլի նպատակը, ըստ լեհ զինվորականների, «Ռուսաստանի ագրեսիվ նկրտումները զսպելն է»:

Ռուսաստանը անարձագանք չի թողնի Լեհաստանի արևելքում ամերիկյան ռազմակայանի հնարավոր ստեղծումը, օրեր առաջ հայտարարեց Ռուսաստանի նախագահի մամուլի խոսնակ Դմիտրի Պեսկովը` արձագանքելով լեհական մամուլի այն տեղեկություններին, որոնց համաձայն՝ Վարշավան առաջարկել է Պենտագոնին Լեհաստանի տարածքում ամերիկյան զրահատանկային դիվիզիա տեղակայել:

«Լեհաստանում ԱՄՆ մշտական ներկայության մասին» վերնագրված փաստաթղթի տեքստը անցած շաբաթավերջին էր հայտնվել լեհական լրատվամիջոցների տրամադրության տակ: Այդ հիմնավորման մեջ նշված է, որ Լեհաստանի տարածքում ամերիկյան ստորաբաժանման տեղակայման գլխավոր նպատակն է լինելու «Ռուսաստանից եկող սպառնալիքների զսպումը»: Լեհ զինվորականները առաջարկում են ամերիկյան ստորաբաժանումները տեղակայել Կալինինգրադի մարզին և Լիտվային հարող շրջանում` այսպես կոչված «Սուվալկիի միջանցքում», խոստանալով այդ նպատակով շուրջ 2 միլիարդ եվրո տրամադրել:

Լեհական թերթերում այս տեղեկությունների ի հայտ գալը համընկավ Վարշավայում Հյուսիսատլանտյան դաշինքի անդամ պետությունների խորհրդարանականների հերթական հավաքի մեկնարկի հետ: Դիմելով դրա մասնակիցներին՝ Լեհաստանի նախագահ Անջեյ Դուդան նշում էր․ – «Ես ցանկանում եմ ընդգծել, որ վերջին երկու տարիների փորձը եկավ վկայելու, որ մենք չենք կարող հավատ տածել Ռուսաստան-ՆԱՏՕ համագործակցության հեռանկարների հանդեպ: Վերջին երկու տարիների փորձը նաև վկայեց, որ Մոսկվան շահագրգռված չէ կառուցողական և ազնիվ երկխոսության ծավալման մեջ: Չհրաժարվելով [Ռուսաստանի հետ] երկխոսության գաղափարից` Հյուսիսատլանտյան դաշինքը նաև պետք է հստակ գնահատական տա ստեղծված կացությանը և հանգի ողջամիտ հետևությունների»:

ՆԱՏՕ-ի գլխավոր քարտուղար Յենս Ստոլտենբերգի խոսքով էլ՝ արդեն առաջիկա ամիսներին ՆԱՏՕ-ն լրջորեն քննարկելու է նախևառաջ Եվրոպայում ուժերի արագ տեղաշարժ ապահովելու հարցը: «Ես կարծում եմ, որ դաշինքի` հուլիսին Բրյուսելում կայանալիք գագաթնաժողովի ընթացքում մենք քննարկելու ենք, թե ինչպես է հարկավոր անհրաժեշտության դեպքում ուժերի տեղաշարժ կազմակերպել: Մենք այժմ քննարկում ենք այսպես կոչված «պատրաստվածության նախաձեռնությունը»` փորձելով առանձնացնել դաշինքի կազմում ներգրավված այն ստորաբաժանումները, որոնք հնարավոր կլինի օգտագործել արագ արձագանքման անհրաժեշտության դեպքում», – նշում էր Ստոլտենբերգը:

Դրա հետ մեկտեղ, ՆԱՏՕ-ի գլխավոր քարտուղարը հատուկ ընդգծում էր, որ Բրյուսելում շարունակում են հուսալ, որ մի օր Ռուսաստանի հետ հնարավոր կլինի բնականոն հարաբերություններ հաստատել: «Մենք պետք է հասկանանք, որ Ռուսաստանը մեր հարևանն է, Ռուսաստանը իր աշխարհագրական դիրքը երբեք չի փոխի: Այդ իսկ պատճառով մենք պետք է կարողանանք գտնել շատ ազդեցիկ ու ազնիվ ուղերձների համադրությունը, երբ նրանք խախտում են միջազգային օրենքները, պատասխանատվություն են կրում կիբերհարձակումների համար, անողոք քայլեր են ձեռնարկում, ինչպես, օրինակ, Սոլսբերիի թունավորումն էր: Այս ամենի ֆոնին մենք պետք է ազդեցիկ ուղերձները համադրենք թափանցիկության և երկխոսության հետ», – ասում էր Ստոլտենբերգը:

Պաշտոնական Վարշավան, սակայն, զգուշացնում է, որ Ռուսաստանից եկող վտանգը ոչ միայն ռազմական է, այլև՝ տնտեսական: Որպես ասվածի գլխավոր ապացույց Լեհաստանի վարչապետ Մատեուշ Մորավեցկին մատնանշում էր Եվրամիության և ՆԱՏՕ-ի անդամ հանդիսացող որոշ պետությունների` նախևառաջ Գերմանիայի պահվածքը, որոնք ակտիվորեն էներգետիկ համատեղ ծրագրեր են առաջ տանում Մոսկվայի հետ` Եվրոպան փաստացի կախվածության մեջ դնելով ռուսաստանյան էներգակիրներից:

«Այսօր այս հավաքի մասնակիցները պետք է իրենց հարց տան` արդյո՞ք Հյուսիսատլանտյան դաշինքի բոլոր անդամները անվտանգությունը չէ, որ վտանգված է: «Հյուսիսային հոսք-2» գազատարի շինարարությունը վտանգ է ներկայացնում թե՛ էներգետիկ անվտանգության և թե՛ եվրոպական համերաշխության տեսանկյունից: Այժմ մենք շրջադարձային մի կետում ենք գտնվում»,  նշել է Լեհաստանի վարչապետը:

Այսպես, Մոսկվան ցույց է տալիս, որ Ռուսաստանը պատրաստ է արձագանքել դեպի իր սահմաններ հյուսիսատլանտյան դաշինքի ենթակառույցների ցանկացած ընդլայնմանը:  Իսկ Վարշավան հանդես է եկել պաշտոնական նախաձեռնությամբ` ԱՄՆ-ին առաջարկելով Լեհաստանի տարածքում մշտական հիմունքներով ամերիկյան զրահատանկային դիվիզիա տեղակայել: Կրեմլը սա սպառնալիք է համարում և ուղիղ նշում, որ այն ընդդեմ անվտանգության և կայունության հաստատման է:

Միաժամանակ, Վաշինգտոնը հայտարարում է, որ ԱՄՆ-ն մտադիր է ընդլայնել Ռուսաստանի դեմ պատժամիջոցները, այս մասին ասել է ԱՄՆ պետքարտուղար Մայք Պոմպեոն՝ Ներկայացուցիչների պալատի արտաքին հարաբերությունների հանձնաժողովում լսումների ժամանակ։ «Ես գիտեմ, որ պատժամիջոցների զգալի քանակություն սահմանվել է CAATSA-ի շրջանակում և ավելի շատ կսահմանվի»,-հավաստել է Պոմպեոն։

Նա հավելել է, որ ԱՄՆ-ն քննարկում է պատժամիջոցների ընդլայնման հնարավորությունը  «Պատժամիջոցների միջոցով Ամերիկայի հակառակորդներին հակազդելու մասին» օրենքի շրջանակում՝ ամերիկացի գործընկերների վրա «չկանխատեսված ազդեցությունը» բացառելու համար։

Մետաքսյա Շալունց



Загрузка...

Hing.am is Stephen Fry proof thanks to caching by WP Super Cache