Սա տանելու է արյունահեղության, իրենց պաշտոնի համար ժողովրդի դեմ են դուրս գալիս. Սասուն Միքայելյան

82

20 տարիների ընթացքում առաջին անգամ ժողովուրդն իր ձայնն է ունեցել, սա չի անցնելու, սա տանելու է արյունահեղության: Այս մասին, այսօր՝ հոկտեմբերի 2-ին, ԱԺ արտահերթ նիստից հետո հայտարարեց «Ելք» խմբակցության պատգամավոր Սասուն Միքայելյանը:

«Իրենց պաշտոնի համար մի ամբողջ ժողովրդի դեմ են դուրս գալիս, առանց մտածելու: Ինչ-որ հրահանգ են կատարում, ինչ-որ բաներ ունեն, որ չեն ուզում կորցնել: Սա բանդա ա, ուզում են ինչ-որ բան անել, բայց չի ստացվելու: Սա քվեարկություն չէր, գաղտագողի գիշերով «ռազվեդգրուպա» մտավ, գաղություն արեցին: Սրանք չեն կարողանում հաշտվեն, որ ժողովուրդը հաղթել ա, պետք ա թողնեն գնան»,-հայտարարեց նա:

Իր հերթին, «Ելք» խմբակցությունից Էդմոն Մարուքյանը հայտարարեց, որ այս օրինագծի նպատակն է, որ վարչապետի հրաժարականի պարագայում ԱԺ-ն ցրելու ընթացակարգը խափանվի:

«Իրենք ասում են՝ տենց բան չկա, դա մի ուժ է արել, մյուս ուժերը կապ չունեն: Հիմա տեսանք, որ բոլոր ուժ-երը կապ ունեն, բացի «Ելք»-ից: Օրենքն ընդունվեց, բայց Սահմանադրությունը հստակ ասում է, որ եթե հրաժարականից հետո 14 օրում վարչապետ չի ընտրվում, խորհրդարանն օրենքի ուժով ցրվում է: հետեւաբար, այս օրենքը, որ իբր սրանով կընդհանտեն նիստը եւ կպահեն այդ ժամկետը, այն ուժ չունի: Այն իրավիճակը չի փոխելու»,-ասաց Մարուքյանը՝ հավելելով, որ դեռ օրենքը պետք է ստորագրվի, ուժի մեջ մտնի:

Ավելի վաղ NEWS.am-ը հայտնել էր, որ քիչ առաջ Ազգային ժողովը 57 կողմ ձայներով երկրորդ ընթերցմամբ ընդունեց «Աժ կանոնակարգ» օրենքում փոփոխություններ անելու մեծ աղմուկ հանած օրինագիծը։ «Ելք» խմբակցության պատգամավորները, հետեւելով վարչապետ Նիկոլ Փաշինյանի կոչին, չեն գրանցվել։

Նշենք, որ արտահերթ նիստը տեւեց մի քանի րոպե, պատգամավորները քվեարկեցին ձեռքով, քանի որ Լենա Նազարյանը հավաքել էր քարտերը։

Նշենք, որ պատգամավորները «ԱԺ կանոնակարգ-օրենքի» 50-րդ հոդվածում փոփոխություն են առաջարկել, որը, ըստ «Ելք»-ի պատգամավորների թույլ կտա խափանել արտահերթ ընտրությունների անցկացումը՝ վարչապետի հրաժարականից հետո: Խոսքն այն մասին է, որ վարչապետի հրաժարականից հետո ժողովուրդը կարող էր շրջափակել ԱԺ շենքը, որ նիստ չգումարվի եւ նոր վարչապետ չընտրվի, որպեսզի ԱԺ-ն ցրվի, իսկ այդ օրինագիծը նախատեսում է, որ նման դեպքում ԱԺ նիստը համարվում է ընդհատված եւ ԱԺ լուծարումը տեղի չի ունենում:

 



Загрузка...

Hing.am is Stephen Fry proof thanks to caching by WP Super Cache