«Սերժ Սարգսյանը ՀՀԿ նախագահն է, իսկ ո՞վ է Կարեն Կարապետյանը». Ռուբեն Մեհրաբյան

0

Անվտանգության խորհուրդը ապրիլից հետո ղեկավարելու է վարչապետը, անդամներն են լինելու հիմնականում ուժային կառույցի ներկայացուցիչները։ Ըստ որոշ փորձագետների՝ Սերժ Սարգսյանն այս քայլով ցույց տվեց, որ ինքն է լինելու վարչապետ և դրա համար էլ իր շուրջն է համախմբում յուրայիններին։

168.am-ը Քաղաքական և միջազգային հետազոտությունների հայկական կենտրոնի փորձագետ, քաղաքագետ Ռուբեն Մեհրաբյանից հետաքրքրվեց, թե ի՞նչ կարծիք ունի այդ ամենի վերաբերյալ։

«Այդ հարցն ունի երկու բաղադրիչ․ պետությունը պետք է ունենա անվտանգության խորհուրդ, այդ անվտանգության խորհուրդը պետք է ռեալ աշխատող կառույց լինի, այլ ոչ թե լինի թղթի վրա, այնտեղ պետք է մտնեն ուժային կառույցների ղեկավարները նույնպես, դա էլ է փաստ, այսինքն՝ ֆորմալ առումով դա է արվել։ Մյուս կողմից՝ այո, կա նաև քաղաքական հարթությունը. դա արվում է ապրիլին ընդառաջ, բայց այնպես չէ, որ հենց այդ քայլով է պայմանավորված, որ վարչապետ կլինի Սերժ Սարգսյանը, դա պարզ էր, իսկ ուրիշ ո՞վ պետք է լինի վարչապետ»,- պարզաբանեց մեր զրուցակիցը։

Դիտարկմանը, թե Կարեն Կարապետյանի անունն է նաև շրջանառվում, նա այսպես արձագանքեց. «Իսկ ո՞վ է Կարեն Կարապետյանը։ Սերժ Սարգսյանը ՀՀԿ նախագահն է, վերջացավ, իսկ ո՞վ է Կարեն Կարապետյանը»։ Մեր այն հարցին, թե առաջին փոխվարչապետի պաշտոնն է ավելանում, հնարավո՞ր է, որ Սերժ Սարգսյանը դառնա վարչապետ, իսկ Կարեն Կարապետյանը՝ առաջին փոխվարչապետ, նա պատասխանեց.

«Վարչապետը պետք է ունենա առաջին տեղակալ, որն ամբողջ այդ կաբինետի անդամների մեջ կլինի առաջինը և ուղիղ կենթարկվի վարչապետին։ Ըստ ամենայնի՝ դա կառավարման տեսակետից անհրաժեշտ պաշտոն է, գոնե հայաստանյան իրողությունների մեջ։ Բացի դրանից՝ մենք հասկանում ենք, որ ապրիլ ամսին չպետք է սպասենք իշխանափոխություն Հայաստանում։ Պետք է սպասենք, որ Հայաստանում ձևավորվել է իշխանություն, այդ իշխանությունը չի փոխվում, փոխվում են միայն ցուցանակները․ այն, ինչ կոչվում էր նախագահ, հիմա կկոչվի վարչապետ, այն, ինչ կոչվում էր վարչապետ, կկոչվի առաջին փոխվարչապետ»։




Загрузка...

Hing.am is Stephen Fry proof thanks to caching by WP Super Cache