Լրահոս

Սերժ Սարգսյանը մնալու ծրագրեր ունի. նա մեկնում է Մոսկվա՝ «դաբրո» ստանալու

 

ՀՀ նախագահի վերջին այցելությունը Փարիզ և հանդիպումը նախագահ Ֆրանսուա Օլանդի հետ, ինչպես նաև մարտի 14-ին նախատեսված այցը Մոսկվա ավելի շատ ներքաղաքական համատեքստ ունեն՝ կապված ընտրությունների և ներքաղաքական զարգացումների հետ, «Առաջին լրատվական»-ի հետ զրույցում կարծիք հայտնեց Ռուսաստանի գիտությունների ակադեմիայի Արևելագիտության ինստիտուտի գիտաշխատող, քաղաքագետ Ալեքսանդր Սկակովը՝ ավելացնելով, որ Սերժ Սարգսյանը ծրագրում է մնալ երկրի ղեկավարի դերում, այդ պատճառով մեկնում է տարբեր մայրաքաղաքներ՝ ստանալու միջազգային գործընկերների աջակցությունը:

– Պարոն Սկակով, Սերժ Սարգսյանի այցը Փարիզ և առաջիկա այցելությունը Մոսկվա որքանո՞վ են կապված ղարաբաղյան հարցի հետ և որքանո՞վ են կապված Հայաստանի ներքաղաքական իրադարձությունների և առաջիկա ընտրությունների հետ:

– Ղարաբաղի շուրջ իրադրությունը, իհարկե, կարող է քննարկվել այդ այցելությունների ընթացքում, բայց դա չէ գլխավոր թեման, որովհետև գլխավորը Հայաստանի ներսում տիրող իրավիճակն է, ընտրությունները և Սարգսյանի ծրագրերը ապագայի մասին: Իր համար կարևոր է ստանալ աջակցություն իր ծրագրերի իրագործմանը և մնալ Հայաստանի իշխանության գլխին:

Իսկ Եվրամիության համար Ղարաբաղի հարցը ավելի քիչ նշանակություն ունի, առավել ևս, որ հիմքեր չկան ասելու, թե Եվրամիությունը կարող է ակտիվանալ այդ հարցում: Այսօր Եվրամիությունը շատ ավելի կարևոր խնդիրներ ունի, գլխավորը Միացյալ Նահանգների հետ հարաբերությունները կարգավորելն է: Ֆրանսիայի նախագահը հեռացող գործիչ է, և դժվար թե նա կարողանա զբաղվել ղարաբաղյան հարցի լուծմամբ: Ուստի, սա առավելապես կապված է երկրի ներքին իրավիճակի հետ:

– Դուք կարծում եք, որ Սերժ Սարգսյանը ծրագրում է մնա՞լ երկրի ղեկավարի դերում, ոչ թե փոխանցել իշխանությունը որևէ մեկի:

– Այլապես ի՞նչ իմաստ կար սահմանադրական բարեփոխումներ իրականացնելու: Կարծում եմ՝ դա ակնհայտ է: Ամեն ինչ արվել է այն նպատակով, որպեսզի Սերժ Սարգսյանը մնա՝ որպես ստվերային ղեկավար կամ իշխող կուսակցության ղեկավար, Ազգային ժողովի խոսնակ կամ էլ այլ տարբերակով:

– Իսկ Կարեն Կարապետյանը որևէ դեր չի՞ խաղում այստեղ:

– Խաղում է, իհարկե, խաղում է: Նրա վրա որոշակի հույսեր են դրել ոչ միայն Մոսկվայում, այլև Հայաստանում, բայց կարծում եմ՝ այդ հույսերը խանդ են առաջացնում նույն Սերժ Սարգսյանի մոտ, որին դուր չի գալիս վարչապետի դերակատարության մեծացումը և վերաբերմունքը նրա հանդեպ:

1in.am


Կիսվիր ընկերներիդ հետ


Загрузка...

Հեղինակի մասին

armhing

armhing