Լրահոս

Ծուղակ են լարել բաժանորդների դեմ

 

1111

hayeli.am —  Բջջային կապի տեղական օպերատորները սպառողներին թյուրիմացության մեջ գցելու հերթական նորամուծություն են մտածել ու, մեկը մյուսին «ախպերավարի պաս տալով», հաջողությամբ գրպանում են սեփական բաժանորդներին: Ընդ որում, համատարած թալանի ակցիաները կատարվում են «ամեն ինչ բաժանորդի համար» հնչեղ կարգախոսի ներքո:
Ինչպես հայտնի է, Հայաստանի հանրային ծառայությունները կարգավորող հանձնաժողովը որոշում է ընդունել Beeline-ին, VivaCell-MTS-ին և Orange Armenia-ին տրամադրել նոր տարածաշրջանային կոդեր:
Խոսքը, այսպես կոչված, MNP ծառայության գործարկման մասին է, որի հնարավորությունը կար 2014թ. ապրիլի 1-ից: Այն հնարավորություն է տալիս առանց հեռախոսահամարի փոփոխության անցում կատարել մեկ բջջային օպերատորից մյուսին: Այսպես. Եթե, օրինակ, ինչ-որ մեկը 077-ով կամ 094-ով սկսվող իր հեռախոսհամարը, որը ի սկսզբանե եղել է «Վիվասելի» տիրույթում որոշի դարձնել, օրինակ, «Օրանժ» կամ «Բիլայն» ցանցի հեռախոսահամար, հանգիստ կարող է օգտվել նշված ծառայությունից և դառնալ մեկ օպերատորի բաժանորդ՝ ամբողջությամբ պահպանելով իր նախկին հեռախոսահամարը: Այսինքն՝ բաժանորդը կարող է իր համարը, նույն կոդով պահպանելով, անցում կատարել մեկ այլ օպերատորի սպասարկման տիրույթ:
Առաջին հայացքից բաժանորդներին տրված լրացուցիչ հնարավորությունը այդ նույն բաժանորդներին փաստի առաջ է կանգնեցնում:
Շատերը հաճախ անտեղյակ լինելով, թե իրականում որ օպերատորի բաժանորդին են զանգել, ստիպված են լինում կլորիկ գումար վճարել:
Որպես կանոն, հայաստանյան օպերատորներն իրենց ցանցի ներսում զանգեր կատարելու խիստ մատչելի սակագնային փաթեթներ են կիրառում, շատ դեպքերում անգամ անվճար են խոսում: Մինչդեռ ցանցից դուրս արդեն սակագները, որպես կանոն, բարձր են լինում: Օրինակ՝ քաղաքացին, ով «Բիլայնի» բաժանորդ է ու այդ ցանցում բոլորի հետ խոսում է անվճար, հավաքում է «Բիլայնի» կոդով հեռախոսահամար՝ մտածելով, որ խոսում է անվճար, հանգիստ, առանց շտապելու, սկսում է զրուցել: Սակայն վերջում պարզվում է, որ իր հավաքած «Արմենտելի» կոդով համարը բոլորովին այլ օպերատորի տիրույթում էր գտնվում, և ինքը ստիպված պետք է վճարի բավականին կլորիկ մի գումար: Մի քանի այսպիսի հեռախոսազանգ, և ամսվա վերջում բաժանորդը բջջային կապի օպերատորին ստիպված նախատեսածից ու պատկերացրածից մի քանի անգամ ավելի մեծ գումար է վճարում:
Նմանօրինակ խնդիրներ ծագում են բոլոր օպերատորների սպասարկման պարագայում: Համարը պահպանելով՝ մեկ օպերատորից մյուսին անցնելու ծառայությունից օրեցօր ավելի մեծաթիվ քաղաքացիներ են օգտվում, իսկ դա նշանակում է, որ օրեցօր մեծանում է մոլորության մեջ հայտնված քաղաքացիների թիվը։
Օպերատորները ըստ էության պարտավոր են բաժանորդներին պատշաճ իրազեկել փոփոխության մասին: Ժամանակին այս հարցին տնտեսական մրցակցության պաշտպանության պետական հանձնաժողովն անդրադարձավ՝ հայտարարելով, որ օպերատորները պետք է իրազեկում կատարեն, բայց ըստ էության այդ իրազեկումը պատշաճ չի կատարվում:
Հիմնականում բջջային կապի օպերատորները այդ իրազեկումը կատարում են այսպես կոչված ձայնային ազդանշանի ուժգնության տոնայնության տարբերությամբ, բայց այդ ձևը չի կարող պատշաճ իրազեկում դիտվել, որովհետև զանգահարողը կարող է իրավացիորեն դժվարանալ ազդանշանները տարբերակելու հարցում:
Հանձնաժողովը նախկինում արդեն փորձել է պարտադրել բջջային բոլոր օպերատորներին՝ պատշաճ կերպով իրազեկել բաժանորդի՝ մեկ ցանցից մյուսին անցում կատարած լինելու մասին` ավտոմատ ձայնային հաղորդագրությամբ տեղյակ պահելով, թե բաժանորդը որ օպերատորից որին է անցում կատարել: Բայց այս պահին դեռ այդ պատշաճ իրազեկումը կատարված չէ: Պատճառը թերևս հասկանալի է. սա ձեռնտու վիճակ է բոլոր օպերատորների համար, և սա այն դեպքն է, երբ բոլորը միասին կարծես թե համաձայնել են բաժանորդի գրպանը մտնել:
Հետաքրքիր է՝ ի՞նչ է մտածում ՏՄՊՊՀ-ն և ինչո՞ւ չի շտապում տուգանել օպերատորներին:

Միացեք մեր ֆեյսբուքյան էջին և հետևեք ամենաուշագրավ նյութերին


Կիսվիր ընկերներիդ հետ

Կայքում տեղ գտած մտքերն ու տեսակետները հեղինակի սեփականությունն են և ոչ միշտ են համընկնում ՀԻՆԳ.am-ի խմբագրության տեսակետների հետ:

Загрузка...

Հրապարակող՝

newhing

newhing