Լրահոս

Զիջում լինելու է միայն մի դեպքում՝ եթե պարտվենք պատերազմում. Դավիթ Բաբայան

 

92833

ԵԱՀԿ ՄԽ ամերիկացի համանախագահ Ջեյմս Ուորլիքի հայտարարության մասին Armtimes.com-ը զրուցել է ԼՂՀ նախագահ Բակո Սահակյանի մամուլի խոսնակ Դավիթ Բաբայանի հետ: Հիշեցնենք, Ուորլիքն այսօր ռուսական «Ինտերֆաքս» գործակալությանը տված հարցազրույցում հայտարարել է, թե ԼՂ կարգավորումը ենթադրում է որոշ տարածքների վերադարձ Ադրբեջանին՝ ԼՂ կարգավիճակի դիմաց:

— Պարոն Բաբայան, երբ ռուսական կողմի նախաձեռնությամբ Մինսկի խմբի համանախագահները սեպտեմբերի ութին հանդիպում էին պլանավորել Մոսկվայում, իսկ ՌԴ ԱԳՆ ներկայացուցիչ Մարիա Զախարովան հայտարարել էր, որ քննարկվելու են ԼՂ խնդրի վերաբերյալ հրատապ հարցեր, Դուք չէիք համաձայնում, որ հրատապ հարցերով հանդիպում է, այսօրվա հարցազրույցից հետո՞ էլ եք այդ կարծիքին:

— Հրատապ հարցեր չեն քննարկել, այստեղ որեւէ արտառոց բան չկա, պետք է հասկանաք մի բան՝ կան դիվանագիտական կանոններ, որոնց համանախագահները որպես միջնորդներ, պարզապես, պարտավոր են հետեւել: Մեսիջը հետեւյալն է, որ պետք է քննարկվեն բոլոր հարցերը, որոնք բարձրացնում են կողմերը: Նրանք չեն կարող անտեսել Ադրբեջանի կողմից բարձրացված հարցերը, բայց դա չի նշանակում, որ մենք պետք է ընդունենք կամ համաձայնենք Ադրբեջանի տեսակետին, ամենեւին: Տարածքների հարցը լուրջ է, օրինակ կա Հյուսիսային Արցախի հարց՝ Գետաշենի, Շահումյանի, Մարտակերտի, Մարտունու շրջանների բռնակցված տարածքների, եւ եթե քննարկում են այս հարցը, պետք է ամբողջական քննարկեն:

— Ջեյմս Ուորլիքը խոսում է տարածքների վերադարձի մասին՝ ԼՂ կարգավիճակի դիմաց, սակայն կարգավիճակը չի հստակեցվում, այն արդյոք ԼՂՀ անկախությա՞ն հարցն է, թե՞ միջազգային կարգավիճակը, որի մասին վերջին շրջանում խոսվում է:

-Այդ հարցը՝ տարածքներ կարգավիճակի դիմաց, միգուցե ինչ-որ մարդիկ ժամանակին ընդունելի էին համարում, որն օբյեկտիվ բնույթ ուներ, 70 տարի Արցախը բռնակցված է եղել, ագրեսիայի թիրախ ենք եղել, եւ դա մեզ մոտ ազգային-ազատագրական շարժման աշխարհընկալում է առաջացրել: Երբ անկախություն ձեռք բերեցինք, ամենակարեւոր խնդիրը մարդկանց համար եղել է կարգավիճակը, որովհետեւ Արցախի անվտանգությունն ու ապագան մարդիկ կարգավիճակի հետ էին կապում: Հետագայում պարզ դարձավ, որ այդ կարգախոսը չի կարող ապահովել Արցախի անվտանգությունը: Այն ժամանակ օրինակ որեւէ մեկը չէր գիտակցում Քարվաճառի շրջանի կարեւորությունը, որտեղից սկիզբ են առնում մեր ջրային պաշարները, հիմա ո՞նց կարող է այդ տարածքի մասին որեւէ խոսակցություն լինի: Եթե Ադրբեջանն ուզում  է կարգավորել խնդիրը, առաջին հերթին պետք է ճանաչի Արցախի հանրապետության անկախությունը, այնուհետեւ եթե հարցեր ունենա, կարող ենք քննարկել սահմանների խնդիրը՝ Գետաշենում, Հյուսիսային Արցախում, բայց խոսել վերադարձի մասին՝ ինչ-որ կարգավիճակի դիմաց… Ադրբեջանը չի թաքցնում, որ որեւէ կարգավիճակ չի ընդունելու, ոչնչացնելու է մեզ: Մինչեւ Ադրբեջանը չճանաչի անկախությունն ու լիարժեք վերականգնի բանակցությունների ձեւաչափը, խոսել նման տարբերակների մասին անիմաստ է:

— Այսինքն, կարգավիճակը ԼՂՀ անկախությու՞նն է:

— Իհարկե, ուրիշ էլ ի՞նչ կարգավիճակ կարող է լինել, թող ճանաչի մեր անկախությունը:

— Հայկական կողմը ոչ մի դեպքում պատրա՞ստ չի զիջման:

— Զիջում կարող է տեղի ունենալ մի դեպքում, երբ պարտվենք:

— Հայկական կողմը 5 շրջանից չի՞ հրաժարվի:

— Եթե Ադրբեջանը չի հրաժարվում իր ագրեսիվ պահվածքից, ուզում է ոչնչացնի մեզ, չի ճանաչում Արցախի հանրապետությունը, ինչի՞ մասին կարելի է խոսել:

— Հստակ կարո՞ղ եք ասել՝ հայկական կողմը դեմ է տարածքներ զիջելուն:

— Մենք որեւէ բան չենք զիջելու, զիջումը լինելու է միայն պատերազմի, պարտության հետեւանքով:

— Իսկ փոխզիջո՞ւմ:

— Այդ դեպքում Ադրբեջանը պետք է ճանաչի մեր անկախությունը,  սահմաների հարցը քննարկվի, այնուհետեւ կքննարկենք սահմանային բոլոր վիճահարույց խնդիրները:

— Խաղաղապահ ուժերի տեղակայման մասին ի՞նչ կարծիք ունեք:

— Որպես գաղափար ընդունելի է, բայց ամենավերջում է լինելու, որովհետեւ հումանիտար մարդասիրական խնդիրներն ամենավերջում են կարգավորվում, օրինակ հայերի՝ Գետաշեն վերադարձի դեպքում ո՞վ պետք է իրենց անվտանգությամբ զբաղվի, եթե դեռ ոչինչ կարգավորված չի, ինչի՞ մասին խոսենք:

— Նախորդ մեր զրույցում ասացիք, որ եթե Մոսկվայում բեկում լինի, չի բացառվում անգամ պաշտպանության նախարարների հանդիպում, ըստ Ձեզ հիմա հնարավո՞ր է:

— Պաշտպանության նախարարների հանդիպումը միշտ էլ հնարավոր է ու պետք է, որովհետեւ հետաքննող մեխանիզմների կիրառումն առաջին հերթին զինված ուժերն են կարգավորում:  Ժամանակին կար պրակտիկա, որ Ադրբեջանի եւ Ղարաբաղի սահմանամերձ ստորաբաժանումների հրամանատարները մշտապես գտնվում էին կապի մեջ, առաջարկել ենք, որ վերականգնվի, Ադրբեջանը  դեմ է: Եթե լինի նման հանդիպում, միցուցե նման հարցն էլ քննարկեն, ուրիշ հարցեր չեն կարող քննարկել:

Չմոռանաք միանալ մեր ֆեյսբուքյան էջին 😉


Կիսվիր ընկերներիդ հետ

Կայքում տեղ գտած մտքերն ու տեսակետները հեղինակի սեփականությունն են և ոչ միշտ են համընկնում ՀԻՆԳ.am-ի խմբագրության տեսակետների հետ:
loading...

Հրապարակող՝

armhing